**ಕಲ್ಬುರ್ಗಿಯಲ್ಲಿ ಅಕ್ಷರ ಜಾತ್ರೆಗೆ ವೈಭವದ ಚಾಲನೆ: ಡಾ. ನಾಗೇಂದ್ರ ಮಸೂತಿ ಕಾವ್ಯ-ಚಿತ್ರಕಲಾ ಪ್ರದರ್ಶನಕ್ಕೆ ಮುನ್ನುಡಿ!**
**ಕಲ್ಬುರ್ಗಿ:**
ಕನ್ನಡದ ಕಂಪು ಪಸರಿಸುವ ಸುದಿನವಿದು. ಕಲ್ಬುರ್ಗಿ ನಗರದ ವಿಶ್ವೇಶ್ವರಯ್ಯ ಭವನದಲ್ಲಿ ಇಂದಿನಿಂದ ಎರಡು ದಿನಗಳ ಕಾಲ ಅದ್ಧೂರಿಯಾಗಿ ಜರುಗಲಿರುವ ಜಿಲ್ಲಾ 23ನೇ ಕನ್ನಡ ಸಾಹಿತ್ಯ ಸಮ್ಮೇಳನಕ್ಕೆ ಸಾಂಸ್ಕೃತಿಕ ಕಳೆಗಟ್ಟಿದೆ. ಸಮ್ಮೇಳನದ ಅಂಗವಾಗಿ ಆಯೋಜಿಸಲಾಗಿದ್ದ ಸಮ್ಮೇಳನಾಧ್ಯಕ್ಷರಾದ ಡಾ. ನಾಗೇಂದ್ರ ಮಸೂತಿ ಅವರ ಭಾವಸ್ಪರ್ಶಿ ‘ಕಾವ್ಯ ಚಿತ್ರಕಲಾ ಪ್ರದರ್ಶನ’ಕ್ಕೆ ವಿಧ್ಯುಕ್ತ ಚಾಲನೆ ದೊರೆತಿದೆ.
**”ಶಬ್ದಕ್ಕೆ ಕಾವ್ಯ ಜೀವಾಳವಾದರೆ, ಬಣ್ಣಕ್ಕೆ ಚಿತ್ರಕಲೆಯೇ ದೃಶ್ಯ ರೂಪ”**
ಚಿತ್ರಕಲಾ ಪ್ರದರ್ಶನ ಉದ್ಘಾಟಿಸಿ ಆಶೀರ್ವಚನ ನೀಡಿದ ಹೊನ್ನಕಿರಣಗಿಯ ಶ್ರೀ ಚಂದ್ರಗುಂಡ ಶಿವಾಚಾರ್ಯರು, *”ಲೇಖಕನ ಕಾವ್ಯವು ಶಬ್ದಗಳ ಮೂಲಕ ಮನಸ್ಸಿನ ಭಾವನೆಗಳಿಗೆ ಜೀವ ನೀಡಿದರೆ, ಚಿತ್ರಕಲೆಯು ಬಣ್ಣ ಮತ್ತು ರೇಖೆಗಳ ಮೂಲಕ ಅದೇ ಭಾವನೆಗಳಿಗೆ ದೃಶ್ಯ ರೂಪವನ್ನು ನೀಡುತ್ತದೆ”* ಎಂದು ಬಣ್ಣಿಸಿದರು.
**ಸಮಾಜದ ಕಣ್ಣಾಗಲಿ ಸಾಹಿತ್ಯ: ಡಾ. ನಾಗೇಂದ್ರ ಮಸೂತಿ**
ಸಮ್ಮೇಳನಾಧ್ಯಕ್ಷ ಡಾ. ನಾಗೇಂದ್ರ ಮಸೂತಿ ಮಾತನಾಡಿ, *”ಸಾಹಿತಿಯಾದವನು ಕೇವಲ ಕಲ್ಪನಾ ಜಗತ್ತಿನಲ್ಲಿರದೆ, ಸಮಾಜಕ್ಕೆ ಕಣ್ಣಾಗುವ ಮತ್ತು ದಾರಿದೀಪವಾಗುವ ಶಕ್ತಿ ಹೊಂದಿರಬೇಕು. ಸಮಾಜದ ಜಾಗೃತ ಶಕ್ತಿಯಾಗಿ ಕಾರ್ಯನಿರ್ವಹಿಸಬೇಕು”* ಎಂದರು. ಕಸಾಪ ಜಿಲ್ಲಾಧ್ಯಕ್ಷ ವಿಜಯಕುಮಾರ ಪಾಟೀಲ ತೇಗಲತಿಪ್ಪಿ, ಹಿರಿಯ ಕಲಾವಿದ ವಿ.ಬಿ. ಬಿರಾದಾರ, ಪರಮೇಶ್ವರ ಶಟಕಾರ, ವಿಜ್ಞಾನಿ ಪ್ರೊ. ಬಿ.ಎ. ಪಾಟೀಲ, ಚಂದ್ರಶೇಖರ ಕಕ್ಕೆರಾ, ಡಾ. ಬಾಬುರಾವ ಶೇರಿಕಾರ, ಶಿವರಾಜ ಅಂಡಗಿ, ರವೀಂದ್ರಕುಮಾರ ಭಂಟನಳ್ಳಿ, ವಿದ್ಯಾಸಾಗರ ದೇಶಮುಖಿ, ಧರ್ಮರಾಜ ಜವಳಿ, ಪರಮಾನಂದ ಸರಸಂಬಿ ಹಾಗೂ ಗಣೇಶ ಚಿನ್ನಾಕರ ಭಾಗವಹಿಸಿದ್ದರು.
**ಸಮ್ಮೇಳನದಲ್ಲಿಂದು:**
ಹಿರಿಯ ಸಾಹಿತಿ ಡಾ. ಚಂದ್ರಕಲಾ ಬಿದರಿ ವೇದಿಕೆಯಲ್ಲಿ ಸಮ್ಮೇಳನದ ಪ್ರಮುಖ ಕಾರ್ಯಕ್ರಮಗಳು ಜರುಗಲಿವೆ:
* **ಉದ್ಘಾಟನೆ:** ಶರಣಬಸವೇಶ್ವರ ವಿದ್ಯಾವರ್ಧಕ ಸಂಘದ ಅಧ್ಯಕ್ಷೆ ಮಾತೋಶ್ರೀ ಡಾ. ದಾಕ್ಷಾಯಣಿ ಅಪ್ಪ ಚಾಲನೆ ನೀಡಲಿದ್ದು, ಹಾರಕೂಡ ಮಠದ ಶ್ರೀ ಡಾ. ಚೆನ್ನವೀರ ಶಿವಾಚಾರ್ಯರು ಸಾನ್ನಿಧ್ಯ ವಹಿಸುವರು.
* **ಗಣ್ಯರ ಉಪಸ್ಥಿತಿ:** ನಿಕಟಪೂರ್ವ ಸಮ್ಮೇಳನಾಧ್ಯಕ್ಷ ಮುಡುಬಿ ಗುಂಡೇರಾವ್, ಜಿಲ್ಲಾಧಿಕಾರಿ **ಇಕ್ರಂ ಶರೀಫ್**, ನಗರ ಪೊಲೀಸ್ ಆಯುಕ್ತ ಡಾ. ಶರಣಪ್ಪ ಹಾಗೂ ರಾಜು ಲೇಂಗಟಿ ಪಾಲ್ಗೊಳ್ಳಲಿದ್ದಾರೆ.
* **ಗೋಷ್ಠಿಗಳು:** ಕಲ್ಯಾಣರಾವ ಪಾಟೀಲ ಅಧ್ಯಕ್ಷತೆಯಲ್ಲಿ ‘ಅರಿವಿನ ಸಿರಿ’ ಗೋಷ್ಠಿ ಹಾಗೂ ಸಾಹಿತಿ ಡಾ. ಚಿ.ಸಿ. ನಿಂಗಣ್ಣ ಅಧ್ಯಕ್ಷತೆಯಲ್ಲಿ ‘ನೋಡು ಕನ್ನಡ ಹಾಡು’ ಕವಿಗೋಷ್ಠಿ ನಡೆಯಲಿದ್ದು, ಪತ್ರಕರ್ತ ರಾಜಕುಮಾರ ಉದನೂರ ಮತ್ತು ಡಾ. ರಾಜೇಂದ್ರ ಕೊಂಡಾ ಉಪಸ್ಥಿತರಿರಲಿದ್ದಾರೆ.
ಕನ್ನಡ ಸಾಮ್ರಾಟ್ news ಬ್ಯುರೋ Kalaburgi
