ಇನ್ಮುಂದೆ ಮದುವೆ ‘ದಿಬ್ಬಣ’ದ ಸಡಗರ ಸೆರೆಹಿಡಿಯಲ್ಲ ಕ್ಯಾಮೆರಾ ಕಣ್ಣು! ಕಾರವಾರ ಫೋಟೋಗ್ರಾಫರ್ಗಳ ಕಠಿಣ ನಿರ್ಧಾರದ ಹಿಂದಿದೆ ಕಣ್ಣೀರಿನ ಕಥೆ
Karwar Photographers Boycott Wedding Barat Shoots | ಮದುವೆ ದಿಬ್ಬಣಕ್ಕೆ ಫೋಟೋಗ್ರಾಫರ್ಸ್ ಬಹಿಷ್ಕಾರ | Kannada Samrat Exclusive News
ನಮಸ್ಕಾರ, ನೀವು ಓದುತ್ತಿದ್ದೀರಿ ‘ಕನ್ನಡ ಸಾಮ್ರಾಟ್’ ವಿಶೇಷ ವರದಿ.
ಮದುವೆ ಎಂದರೆ ಅಲ್ಲಿ ಸಡಗರ, ಸಂಭ್ರಮ. ಅದರಲ್ಲೂ ತಡರಾತ್ರಿ ವರೆಗೆ ಕುಣಿದು ಕುಪ್ಪಳಿಸುವ ‘ದಿಬ್ಬಣ’ ಅಥವಾ ‘ಬಾರಾತ್’ ಅಂದರೆ ಯುವಕರಿಗೆ ಬಲು ಅಚ್ಚುಮೆಚ್ಚು. ನಮ್ಮ ಬದುಕಿನ ಅತಿ ಸುಂದರ ಕ್ಷಣಗಳನ್ನು ಕ್ಯಾಮೆರಾದಲ್ಲಿ ಸೆರೆಹಿಡಿದು, ಆ ನೆನಪುಗಳನ್ನು ನಮಗೆ ಆಜೀವ ಪರ್ಯಂತ ಜೀವಂತವಾಗಿರಿಸುವವರು ಫೋಟೋಗ್ರಾಫರ್ಗಳು. ಆದರೆ, ಇನ್ನು ಮುಂದೆ ಕಾರವಾರದಲ್ಲಿ ನಡೆಯುವ ಮದುವೆ ದಿಬ್ಬಣಗಳಲ್ಲಿ ಫೋಟೋಗ್ರಾಫರ್ಗಳ ಕ್ಯಾಮೆರಾ ಫ್ಲ್ಯಾಶ್ಗಳು ಮಿಂಚುವುದಿಲ್ಲ! ಹೌದು, ಕಾರವಾರ ಫೋಟೋಗ್ರಾಫರ್ಸ್ ಅಸೋಸಿಯೇಷನ್ ಇಂಥದ್ದೊಂದು ಕಠಿಣ ಹಾಗೂ ಅನಿವಾರ್ಯ ನಿರ್ಧಾರವನ್ನು ಕೈಗೊಂಡಿದೆ.
ಕ್ಯಾಮೆರಾ ಹಿಂದಿನ ಕಣ್ಣೀರು: ದಿಬ್ಬಣಕ್ಕೆ ಬಹಿಷ್ಕಾರವೇಕೆ?
ಫೋಟೋಗ್ರಾಫರ್ಗಳು ಕೂಡ ಯಂತ್ರಗಳಲ್ಲ, ಅವರೂ ನಮ್ಮ-ನಿಮ್ಮಂತೆ ಮನುಷ್ಯರು. ಕಾರವಾರ ಫೋಟೋಗ್ರಾಫರ್ಸ್ ಅಸೋಸಿಯೇಷನ್ ಅಧ್ಯಕ್ಷ ಸಂತಾನ್ ಫರ್ನಾಂಡೀಸ್ ಅವರ ಪ್ರಕಾರ, ಇತ್ತೀಚಿನ ದಿನಗಳಲ್ಲಿ ಮದುವೆ ದಿಬ್ಬಣಗಳು ತಡರಾತ್ರಿಯವರೆಗೂ, ಕೆಲವೊಮ್ಮೆ ಬೆಳಗಿನ ಜಾವದವರೆಗೂ ಮುಂದುವರಿಯುತ್ತಿವೆ. ಇದರಿಂದಾಗಿ ಛಾಯಾಗ್ರಾಹಕರು ನಿದ್ದೆ, ಊಟ, ವಿಶ್ರಾಂತಿ ಇಲ್ಲದೆ ದುಡಿಯುವಂತಾಗಿದೆ.
ಇದಕ್ಕಿಂತಲೂ ಆತಂಕಕಾರಿ ವಿಚಾರವೆಂದರೆ ಭದ್ರತೆಯ ಕೊರತೆ. ತಡರಾತ್ರಿಯ ದಿಬ್ಬಣಗಳಲ್ಲಿ ಕೆಲವರು ಮದ್ಯದ ಅಮಲಿನಲ್ಲಿ ಫೋಟೋಗ್ರಾಫರ್ಸ್ ಹಾಗೂ ವಿಡಿಯೋಗ್ರಾಫರ್ಗಳ ಜೊತೆ ತೀರಾ ಅಮಾನವೀಯವಾಗಿ, ಅನುಚಿತವಾಗಿ ವರ್ತಿಸುತ್ತಿದ್ದಾರೆ. ತಮ್ಮ ಹೊಟ್ಟೆಪಾಡಿಗಾಗಿ ಅವರು ಬಳಸುವ, ಲಕ್ಷಾಂತರ ರೂಪಾಯಿ ಬೆಲೆಬಾಳುವ ಕ್ಯಾಮೆರಾಗಳನ್ನು ಕಸಿದುಕೊಳ್ಳಲು ಯತ್ನಿಸುವುದು, ಹಾನಿ ಮಾಡುವುದು ನಡೆಯುತ್ತಿದೆ. ನಮ್ಮ ಮುಖದ ನಗುವನ್ನು ಸೆರೆಹಿಡಿಯುವ ಜೀವಗಳಿಗೆ ಭದ್ರತೆಯೇ ಇಲ್ಲದಂತಾಗಿರುವುದು ನಿಜಕ್ಕೂ ಸಮಾಜ ತಲೆತಗ್ಗಿಸುವಂಥ ಸಂಗತಿ ಎಂದು ಅಸೋಸಿಯೇಷನ್ ಸದಸ್ಯರು ತೀವ್ರ ಬೇಸರ ವ್ಯಕ್ತಪಡಿಸಿದ್ದಾರೆ.
ಇನ್ನುಮುಂದೆ ಕಲ್ಯಾಣ ಮಂಟಪದಲ್ಲಿ ಮಾತ್ರ ಕ್ಲಿಕ್!
ತಮ್ಮ ಜೀವ ಹಾಗೂ ಜೀವನೋಪಾಯದ ಸಾಧನವಾದ ಕ್ಯಾಮೆರಾಗಳ ರಕ್ಷಣೆಗಾಗಿ, ಇನ್ನು ಮುಂದೆ ಕೇವಲ ಮದುವೆ ಹಾಲ್ (ಕಲ್ಯಾಣ ಮಂಟಪ) ಒಳಗೆ ಮಾತ್ರ ಫೋಟೋ ಹಾಗೂ ವಿಡಿಯೋ ಚಿತ್ರೀಕರಣ ಮಾಡಲು ಸಂಘ ತೀರ್ಮಾನಿಸಿದೆ. ಬೀದಿಯಲ್ಲಿ ತಡರಾತ್ರಿ ನಡೆಯುವ ಬಾರಾತ್ಗಳಿಗೆ ಯಾವುದೇ ಕಾರಣಕ್ಕೂ ತೆರಳದಿರಲು ಒಮ್ಮತದ ನಿರ್ಣಯ ಕೈಗೊಳ್ಳಲಾಗಿದೆ. ಈ ಮೂಲಕ ತಮ್ಮ ಸುರಕ್ಷತೆಗೆ ತಾವೇ ಕವಚ ಹಾಕಿಕೊಂಡಿದ್ದಾರೆ.
ಗ್ರಾಹಕರಿಗೆ ದರ ಏರಿಕೆಯ ಬಿಸಿ!
ಇದೇ ವೇಳೆ, ದಿನೇ ದಿನೇ ಹೆಚ್ಚುತ್ತಿರುವ ವೆಚ್ಚಗಳ ಹಿನ್ನೆಲೆಯಲ್ಲಿ ಫೋಟೋಗ್ರಫಿ ಸೇವೆಗಳ ದರ ಏರಿಕೆ ಮಾಡುವುದಾಗಿಯೂ ಸಂಘದ ಮುಖಂಡರು ಘೋಷಿಸಿದ್ದಾರೆ. ಪಾಸ್ಪೋರ್ಟ್ ಸೈಜ್ ಫೋಟೋ ಸೇರಿದಂತೆ ವಿವಿಧ ಫೋಟೋಗ್ರಫಿ ಸೇವೆಗಳ ದರವನ್ನು ಶೀಘ್ರದಲ್ಲೇ ಪರಿಷ್ಕರಿಸಲಾಗುವುದು ಎಂದು ತಿಳಿಸಿದ್ದಾರೆ.
ಕಾರವಾರದಲ್ಲಿ ನಡೆದ ಈ ಸುದ್ದಿಗೋಷ್ಠಿಯಲ್ಲಿ ಸಂಘದ ಉಪಾಧ್ಯಕ್ಷ ರವಿ ನಾಯ್ಕ, ಜಿಲ್ಲಾ ಉಪಾಧ್ಯಕ್ಷ ಅನಂತ ಪೈ, ಕಾರ್ಯದರ್ಶಿ ಜಯಪ್ರಕಾಶ್ ಗೋಸಾವಿ ಹಾಗೂ ಪ್ರಮುಖ ಸದಸ್ಯರಾದ ಅನಿಲ್ ನಾಯ್ಕ, ಮನೋಜ ನಾಯ್ಕ, ಪ್ರಮೋದ ನಾಯ್ಕ ಮುಂತಾದವರು ಉಪಸ್ಥಿತರಿದ್ದು, ತಮ್ಮ ಅಳಲನ್ನು ತೋಡಿಕೊಂಡರು.
ಕನ್ನಡ ಸಾಮ್ರಾಟ್ನ ಕಳಕಳಿ:
ನಮ್ಮ ಮನೆಗಳ ಶುಭಕಾರ್ಯಗಳನ್ನು ಕಳೆಗಟ್ಟುವಂತೆ ಮಾಡುವ ಛಾಯಾಗ್ರಾಹಕರ ಶ್ರಮಕ್ಕೆ ಬೆಲೆ ಕೊಡುವುದು ನಮ್ಮೆಲ್ಲರ ಆದ್ಯ ಕರ್ತವ್ಯ. ಅವರೊಡನೆ ಸೌಜನ್ಯದಿಂದ ವರ್ತಿಸೋಣ, ಅವರ ವೃತ್ತಿಯನ್ನು ಗೌರವಿಸೋಣ. ಕಲಾವಿದರಿಗೆ ಹಾಗೂ ಶ್ರಮಜೀವಿಗಳಿಗೆ ಗೌರವ ನೀಡುವ ಸಮಾಜ ನಮ್ಮದಾಗಲಿ.
- ವಿಶೇಷ ವರದಿ, ಕನ್ನಡ ಸಾಮ್ರಾಟ್ (Kannada Samrat)
