ಆರ್ಥಿಕ ಸಂಕಷ್ಟದಿಂದ ಬಾಯ್ತಪ್ಪಿದ ಮಾತು: ವಾಣಿಜ್ಯ ಮಂಡಳಿಯಲ್ಲಿ ಕಣ್ಣೀರಿಟ್ಟು ಕ್ಷಮೆ ಕೇಳಿದ ನಿರ್ಮಾಪಕ ಕನಕಪುರ ಶ್ರೀನಿವಾಸ್; ಸ್ಟಾರ್ ನಟರ ಬಗ್ಗೆ ಹೇಳಿದ್ದೇನು
ಬೆಂಗಳೂರು: ಸಿನಿಮಾ ನಿರ್ಮಾಣ ಎಂಬುದು ಬಣ್ಣದ ಲೋಕದ ಜೂಜಾಟವಿದ್ದಂತೆ. ಇಲ್ಲಿ ಯಶಸ್ಸಿನ ನಗುವಿಗಿಂತ, ಸೋಲಿನ ಹಾಗೂ ಆರ್ಥಿಕ ಸಂಕಷ್ಟದ ಕಣ್ಣೀರು ಹೆಚ್ಚು. ಇದೇ ಆರ್ಥಿಕ ಸಂಕಷ್ಟದ ಸುಳಿಯಲ್ಲಿ ಸಿಲುಕಿ, ಹತಾಶೆಯಿಂದ ಸ್ಯಾಂಡಲ್ವುಡ್ನ ಸ್ಟಾರ್ ನಟರ ಬಗ್ಗೆ ಅವಹೇಳನಕಾರಿಯಾಗಿ ಮಾತನಾಡಿದ್ದ ಹಿರಿಯ ನಿರ್ಮಾಪಕ ಕನಕಪುರ ಶ್ರೀನಿವಾಸ್ ಇದೀಗ ಪಶ್ಚಾತ್ತಾಪದ ಕಣ್ಣೀರಿಟ್ಟಿದ್ದಾರೆ.
ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿಯಲ್ಲಿ ಅಧ್ಯಕ್ಷೆ ಜಯಮಾಲಾ ಅವರ ಸಮ್ಮುಖದಲ್ಲಿ ಬಹಿರಂಗವಾಗಿ ಕಾಣಿಸಿಕೊಂಡ ಅವರು, “ನಾನು ಓದಿಲ್ಲ, ಆರ್ಥಿಕ ಮುಗ್ಗಟ್ಟಿನ ಒತ್ತಡದಲ್ಲಿ ಏನೇನೋ ಮಾತನಾಡಿಬಿಟ್ಟೆ, ದಯವಿಟ್ಟು 7 ಕೋಟಿ ಕನ್ನಡಿಗರು ನನ್ನನ್ನು ಕ್ಷಮಿಸಿ” ಎಂದು ಭಾವುಕರಾಗಿ ಕೈಮುಗಿದಿದ್ದಾರೆ.
ಆರ್ಥಿಕ ಸಂಕಷ್ಟವೇ ಎಲ್ಲದಕ್ಕೂ ಕಾರಣ!
‘ಕಾಟನ್ಪೇಟೆ ಗೇಟ್’ ಸಿನಿಮಾ ಬಿಡುಗಡೆಯ ಪತ್ರಿಕಾಗೋಷ್ಠಿಯಲ್ಲಿ ಎಮೋಷನಲ್ ಆಗಿ ಸ್ಟಾರ್ ನಟರ ವಿರುದ್ಧ ಗುಡುಗಿದ್ದ ಶ್ರೀನಿವಾಸ್ ಅವರ ಆಕ್ರೋಶದ ಹಿಂದಿದ್ದದ್ದು ಅದೇ ಸಿನಿಮಾದ ಬಿಡುಗಡೆಯ ನೋವು. “ಕಳೆದ ಎರಡು ವರ್ಷಗಳಿಂದ ನನ್ನ ಸಿನಿಮಾ ರಿಲೀಸ್ ಆಗಿರಲಿಲ್ಲ. ತೀವ್ರವಾದ ಹಣಕಾಸಿನ ಅಗತ್ಯವಿತ್ತು. ಸಿನಿಮಾ ಬಿಡುಗಡೆಯಾಗಲೇಬೇಕೆಂಬ ಹಂಬಲ ಹಾಗೂ ದುಃಖದ ಕಟ್ಟೆಯೊಡೆದು ತಿಳಿಯದೆ ಆ ಮಾತುಗಳನ್ನಾಡಿದ್ದೇನೆ” ಎಂದು ತಮ್ಮ ನೋವನ್ನು ಹೊರಹಾಕಿದರು.
“ಅಪ್ಪು ಸರ್ ನಮಗೆ ದೇವರಿದ್ದಂತೆ, ಶಿವಣ್ಣನ ಉಪಕಾರ ಮರೆಯಲ್ಲ”
ಡಾ. ರಾಜ್ಕುಮಾರ್ ಕುಟುಂಬದ ಮೇಲಿನ ತಮ್ಮ ಅಭಿಮಾನವನ್ನು ಎಳೆಎಳೆಯಾಗಿ ಬಿಚ್ಚಿಟ್ಟ ಅವರು, ಪುನೀತ್ ರಾಜ್ಕುಮಾರ್ ಅವರನ್ನು ದೇವರಿಗೆ ಹೋಲಿಸಿದರು. “ಪುನೀತ್ ಸರ್ ಜೊತೆ ಸಿನಿಮಾ ಮಾಡುವ ಮುಂಚೆಯಿಂದಲೂ ನನಗೆ ಒಡನಾಟವಿತ್ತು. ‘ಮಯೂರ’ ಸಿನಿಮಾ ಸೆಟ್ಟೇರಬೇಕಿತ್ತು, ಆದರೆ ಆಗಲಿಲ್ಲ. ಅಪ್ಪು ಸರ್ ನಮಗೆ ದೇವರಿದ್ದಂತೆ” ಎಂದರು.
ಹ್ಯಾಟ್ರಿಕ್ ಹೀರೊ ಶಿವರಾಜ್ಕುಮಾರ್ ಅವರ ಬಗ್ಗೆಯೂ ಅಪಾರ ಗೌರವ ವ್ಯಕ್ತಪಡಿಸಿದ ಶ್ರೀನಿವಾಸ್, “ಶಿವಣ್ಣ ನನಗೆ ಎಷ್ಟೋ ಸಹಾಯ ಮಾಡಿದ್ದಾರೆ. ಅವರ ಜೊತೆ ಐದು ಸಿನಿಮಾಗಳನ್ನು ಮಾಡಿದ್ದೇನೆ. ಅವರ ಉಪಕಾರವನ್ನು ಈ ಜೀವ ಇರುವವರೆಗೂ ಮರೆಯಲ್ಲ. ವಿದ್ಯಾವಂತನಲ್ಲದ ನಾನು ಮನಸ್ಸಿನಲ್ಲಿದ್ದ ಆಕ್ರೋಶವನ್ನು ಹೊರಹಾಕಿ ತಪ್ಪು ಮಾಡಿದೆ. ಶಿವಣ್ಣ.. ದಯವಿಟ್ಟು ಕೈಮುಗಿದು ಕೇಳುತ್ತೇನೆ, ನಿಮ್ಮ ಜೊತೆ ನಾನಿನ್ನೂ ಸಿನಿಮಾ ಮಾಡಬೇಕು, ನನ್ನನ್ನು ಕ್ಷಮಿಸಿ” ಎಂದು ಗದ್ಗದಿತರಾದರು.
“ದರ್ಶನ್ ನಮ್ಮ ಮಾಸ್ ಹೀರೋ, ಅವರೇ ನನಗೆ ಹಣ ಕೊಡಬೇಕಿತ್ತು”
ದರ್ಶನ್ ಅವರೊಂದಿಗಿನ ಹಣಕಾಸಿನ ವಿಚಾರದ ಬಗ್ಗೆಯೂ ಮುಕ್ತವಾಗಿ ಮಾತನಾಡಿದ ಶ್ರೀನಿವಾಸ್, “ನಾನು ದರ್ಶನ್ ಅವರಿಗೆ ಹಣ ಕೇಳಿದ್ದೆ. ಸ್ವಲ್ಪ ಸಮಯಾವಕಾಶ ಕೊಡಿ, ತಾಳ್ಮೆಯಿಂದ ಇರು ಎಂದು ಅವರು ಹೇಳಿದ್ದರು. ಅವರು ನನಗೆ ಹಣ ಕೊಡಬೇಕಿತ್ತು. ನನ್ನಿಂದ ತಪ್ಪಾಗಿದೆ ದರ್ಶನ್ ಅಣ್ಣ. ಅವರು ನಮ್ಮ ಮಾಸ್ ಹೀರೋ, ಮುಂದೆಯೂ ಅವರ ಜೊತೆ ಸಿನಿಮಾ ಮಾಡುತ್ತೇನೆ” ಎಂದು ಸ್ಪಷ್ಟನೆ ನೀಡಿದರು.
ಕಲಾವಿದರಿಲ್ಲದೆ ನಾವಿಲ್ಲ: ಕಾಲ್ಶೀಟ್ಗಾಗಿ ಮನವಿ
“ಆಕ್ಷನ್ ಪ್ರಿನ್ಸ್ ಧ್ರುವ ಸರ್ಜಾ ಅವರ ಜೊತೆಗೂ ಮೂರು ಸಿನಿಮಾಗಳನ್ನು ಮಾಡಿದ್ದೇನೆ. ಕಲಾವಿದರು ಇಲ್ಲದೆ ನಾವು ಸಿನಿಮಾ ಮಾಡಲು ಸಾಧ್ಯವಿಲ್ಲ, ನಮಗೆ ಕಲಾವಿದರು ಬೇಕೇಬೇಕು. ದಯವಿಟ್ಟು ನಮಗೆ ಕಾಲ್ಶೀಟ್ ಕೊಡಿ, ಒಳ್ಳೆ ನಿರ್ದೇಶಕರೊಂದಿಗೆ ಉತ್ತಮ ಸಿನಿಮಾ ಮಾಡುತ್ತೇನೆ. ನನ್ನಿಂದ ತಪ್ಪಾಗಿದ್ದರೆ ದಯವಿಟ್ಟು ಕ್ಷಮಿಸಿ. ನನ್ನ ಮಾತುಗಳನ್ನು ಹಿಂಪಡೆಯುತ್ತಿದ್ದೇನೆ” ಎಂದು ಕನಕಪುರ ಶ್ರೀನಿವಾಸ್ ತಮ್ಮ ಮಾತಿಗೆ ವಿರಾಮ ಹಾಡಿದರು.
ಒಟ್ಟಿನಲ್ಲಿ, ಆರ್ಥಿಕ ಸಂಕಷ್ಟ ಒಬ್ಬ ಮನುಷ್ಯನನ್ನು ಯಾವ ಹಂತಕ್ಕಾದರೂ ಕೊಂಡೊಯ್ಯಬಹುದು ಎಂಬುದಕ್ಕೆ ಕನಕಪುರ ಶ್ರೀನಿವಾಸ್ ಅವರ ಈ ಘಟನೆ ಒಂದು ಜೀವಂತ ಉದಾಹರಣೆ. ಅವರ ಈ ಪ್ರಾಮಾಣಿಕ ಕ್ಷಮೆಯನ್ನು ಸ್ಯಾಂಡಲ್ವುಡ್ ಸ್ಟಾರ್ಗಳು ಹಾಗೂ ಕನ್ನಡಿಗರು ದೊಡ್ಡ ಮನಸ್ಸಿನಿಂದ ಸ್ವೀಕರಿಸುತ್ತಾರಾ ಕಾದು ನೋಡಬೇಕಿದೆ.
ಕನ್ನಡ ಸಮ್ರಾಟ್ ವಿಶೇಷ ವರದಿ
